على بعد أيام قليلة من انطلاقه، دخلت جماعة اكفاي في أجواء الاستعداد لموسم التبوريدة السنوي، اللي غادي يبدا نهار الجمعة الجاية تزامنا مع احتفالات عيد العرش المجيد.
والاستعدادات هاد العام فيها خدمة كبيرة على الأرض. السيد قائد المركز الترابي للدرك الملكي والسيد رئيس جماعة اكفاي والسيد القائد قيادة أكفاي واقفين مباشرة على التتبع ديال كل صغيرة وكبيرة، من تهيئة فضاء العرض حتى لتنظيم دخول الجمهور وتأمين الفرسان. الهدف واضح: موسم منظم، آمن، ويليق باسم المنطقة.
الاجتماعات التنسيقية كانت متواصلة مع ممثلي فرق الخيالة وفعاليات المجتمع المدني، باش يتحط البرنامج النهائي وتتوزع المهام. الكل متفق على أن الموسم ماشي غير استعراض، راه مناسبة كتجمع الناس على تراثهم وكتعطي صورة زوينة على التقاليد ديال المنطقة.
ومع قرب عيد العرش، كتاخد الدورة هاد العام طابع خاص. فرق من اكافي والجماعات المجاورة كيوجدو الخيل والبارود واللباس التقليدي، والجمهور بدا كيتسناه بفارغ الصبر. الأجواء اللي كتكون فالموسم معروفة: صوت البارود، حركة الخيل، والفرحة اللي كتجمع الكبار والصغار.
السلطات المحلية كتأكد أنها عبأت كل الإمكانيات باش يمر كلشي فظروف مزيانة، ويكون الموسم فرصة للاحتفال بروح وطنية وبأصالة موروث كيميز اكفاي.
أيوب زهير
